ممبئی (شوبز ڈیسک) بالی ووڈ اداکارہ کرینہ کپور نے جم سے باہر نکلتے ہوئے اپنی ایک وائرل ویڈیو کے بعد حاملہ ہونے کی افواہوں کو ہنس کر ٹال دیا، کچھ سوشل میڈیا صارفین یہ قیاس آرائیاں کر رہے تھے کہ وہ امید سے ہیں۔
اداکارہ کی ٹیم اور سیف علی خان کی ہمشیرہ صبا پٹودی کی جانب سے ان افواہوں کی تردید کے بعد اب کرینہ نے خود بھی سوشل میڈیا پر ایک مزاحیہ پوسٹ کے ذریعے ان خبروں کا جواب دیا ہے۔
کرینہ نے انسٹاگرام پر ایک ایسے شخص کی تصویر شیئر کی جو اپنا پھولا ہوا پیٹ دکھا رہا ہے، جس کے پس منظر میں فلم ہم آپ کے ہیں کون کا گانا ‘چاکلیٹ لائم جوس’ چل رہا تھا۔
انہوں نے پوسٹ کے ساتھ ہنسنے والے اور پیزا کے ایموجیز بھی شامل کیے، جس سے بظاہر یہ اشارہ ملتا ہے کہ وائرل ویڈیو میں نظر آنے والا پیٹ صرف زیادہ کھانا کھانے کا نتیجہ تھا۔
چند روز قبل انہیں شہر میں زرد شرٹ اور سیاہ پتلون میں بے حد خوبصورت انداز میں بھی دیکھا گیا۔ اداکارہ نے اپنے بالوں کو جوڑے کی شکل میں باندھ کر اپنی لُک کو مکمل کیا۔ ان کے اس نئے انداز نے جاری تمام قیاس آرائیوں کو ختم کر دیا۔
حال ہی میں سیف علی خان اور کرینہ اپنے بیٹوں تیمور علی خان اور جہانگیر علی خان کے ساتھ سیف کی سالگرہ منانے کے لیے فیملی چھٹیوں پر گئے تھے۔
بعد ازاں کرینہ نے اس ٹرپ کی تصاویر سوشل میڈیا پر شیئر کی تھیں، جن میں مداحوں کو ان کے ڈنر اور پاستا و پیزا سمیت مزیدار کھانوں کی جھلکیاں دیکھنے کو ملیں۔
کرینہ جلد ہی میگھنا گلزار کی فلم دائرہ میں نظر آئیں گی۔ یہ بطور مرکزی اداکارہ ان کی 68 ویں فلم ہے اور اس میں پرتھویراج سوکومارن بھی ایک اہم کردار میں ہیں۔ یہ فلم 18 ستمبر کو سنیما گھروں میں ریلیز کے لیے تیار ہے۔
