بیجنگ :چین کے نائب صدر ہان زینگ نے جارجیا کے دارالحکومت تبلیسی میں جارجیا کے صدر میخائل کویلاشویلی سے ملاقات کی۔ ہان زینگ نے صدر شی جن پھنگ کی جانب سے صدر میخائل کویلاشویلی کے لیے نیک خواہشات اور تہنیتی پیغام پہنچایا۔ انہوں نے کہا کہ جارجیا جنوبی قفقاز کے خطے میں چین کا پہلا تزویراتی شراکت دار ہے اور یوریشیا کے خطے میں چین کے ساتھ آزاد تجارتی انتظام قائم کرنے والا پہلا ملک بھی ہے۔ دونوں ممالک کے درمیان سفارتی تعلقات کے قیام کے 34 برسوں کے دوران باہمی احترام، باہمی اعتماد، تعاون اور باہمی مفاد کے اصولوں پر قائم رہتے ہوئے دوطرفہ تعلقات کی صحت مند اور مستحکم ترقی کو فروغ دیا گیا ہے۔ رواں سال جون میں صدر شی جن پھنگ اور صدر میخائل کویلاشویلی نے مشترکہ طور پر چین۔جارجیا تعلقات کو جامع تزویراتی شراکت داری کی سطح تک بڑھانے کا اعلان کیا، جس سے دونوں ممالک کے تعلقات کی ترقی کے ایک نئے مرحلے کا آغاز ہوا اور مختلف شعبوں میں تعاون کو نئی قوت ملی۔ چین جارجیا کے ساتھ رابطے اور ہم آہنگی مضبوط بنانے، دونوں ممالک کے رہنماؤں کے درمیان طے پانے والے اہم اتفاقِ رائے پر مشترکہ طور پر مؤثر عمل درآمد اور چین۔جارجیا تعلقات کو آگے بڑھانے کے لیے تیار ہے۔صدر میخائل کویلاشویلی نے کہا کہ جارجیا اور چین دونوں قدیم تہذیبوں کے حامل ممالک ہیں۔ دونوں فریق ایک دوسرے کا احترام اور اعتماد کرتے ہیں، تعاون کے روابط مسلسل مضبوط ہو رہے ہیں جبکہ دونوں ممالک کے عوام کے درمیان آمد و رفت بھی بڑھ رہی ہے۔ جارجیا چین کے ساتھ تعاون پر فخر محسوس کرتا ہے۔ جارجیا بیلٹ اینڈ روڈ انیشی ایٹو میں شامل ہونے والے اولین ممالک میں سے ایک ہے اور چین کے ساتھ باہمی رابطے، بنیادی ڈھانچے کی تعمیر، اقتصادی و تجارتی امور، سیاحت، کھیل اور تعلیم سمیت مختلف شعبوں میں تعاون مسلسل مضبوط بنانے، دونوں ممالک کے لیے زیادہ فوائد اور عوام کے لیے زیادہ فلاح و بہبود پیدا کرنے اور چین۔جارجیا جامع تزویراتی شراکت داری کو مسلسل فروغ دینے کا خواہاں ہے۔ہان زینگ نے جارجیا کے وزیر اعظم ارکلی کوباخیدزے سے بھی ملاقات کی۔
